গুৱাহাটীত ফ্লেট বিক্ৰীৰ নামত প্ৰবঞ্চনা

    প্ৰতি বছৰে অসমৰ বিভিন্ন ঠাইৰ পৰা হেজাৰ বিজাৰ মানুহ গুৱাহাটীত বসবাস কৰিবলৈ লয় - কোনোবাই চাকৰি সুত্ৰে, আন কোনোবাই ব্যৱসায়ৰ বাবে ৷ সেই সকলো মানুহৰে মনত একান্ত ইচ্ছা তেওঁলোকে কাম কৰা চহৰখনতে এটা সৰুকৈ হ’লেও ঘৰ সাজি থাকিবলৈ ৷ ঘৰ সাজিবলৈ প্ৰথমে প্ৰয়োজন এডোখৰ মাটিৰ ৷ গুৱাহাটী চহৰত মাটিৰ যি জুই-ছাই দাম, কিনাৰ সাধ্য দুই-এজনৰ হে থাকে ৷ মাটি কিনিলেও হয় পাহাৰৰ ওপৰত, নহ’লে মহানগৰৰ নিলগত পথাৰৰ মাজত ৷ বাট-পথ হোৱালৈ বছৰ বছৰ ধৰি ৰৈ থাকিব লাগে ৷ আনফালে মাটি কিনিবলৈ বেঙ্কৰ ঋণ পোৱা নাযায় ৷ তেনে সময়তে বিংশ শতিকাৰ শেষৰ ফালে গুৱাহাটীত আৰম্ভ হয় এপাৰ্টমেণ্টৰ নিৰ্মাণ ৷ লাহে লাহে মানুহে ফ্লেট কিনিবলৈ ল’লে ৷ ফ্লেটত থাকি অভ্যস্ত হ’বলৈ ল’লে ৷  দিনে দিনে ফ্লেটৰ চাহিদা বাঢ়িবলৈ ধৰে ৷ এতিয়া চহৰৰ চুকে কোণে সকলোতে দেখিবলৈ পোৱা যায় ডাঙৰ-সৰু এপাৰ্টমেণ্টবোৰ ৷

গুৱাহাটীত চাকৰি সূত্ৰে থকা ত্ৰিশ বছৰ পাৰ হ’ল ৷ মোৰো এপাৰ্টমেণ্ট কিনাৰ কিছু অভিজ্ঞতা হ’ল ৷ সেই অভিজ্ঞতাৰ পৰা দেখা গৈছে যে এপাৰ্টমেণ্টৰ বিল্ডাৰ বা প্ৰম’টাৰ বোৰক তিনি ভাগত ভগাব পাৰি ৷ প্ৰথম শ্ৰেণীৰ বিল্ডাৰ সকলে বিস্তৃত এলেকা লৈ কেইবাটাও এপাৰ্টমেণ্ট বিল্ডিঙ একেলগে নিৰ্মাণ কৰে ৷ পাৰ্ক, ছুইমিং পুল, কমিউনিটি হ’ল, ব্যায়াম ঘৰ আদি নানান সুবিধা উপলব্ধ কৰি নিৰ্মাণ কৰা হয় এই এপাৰ্টমেণ্টবোৰ ৷ সুবিধা যিমানে বেছি হয় তাৰ দামো সিমানে বেছি হয় ৷ নিম্ন মধ্যবিত্তৰ বাবে ইয়াক কিনা সম্ভৱ নহয় ৷ দ্বিতীয় শ্ৰেণীৰ বিল্ডাৰে মধ্যম আকৃতিৰ এপাৰ্টমেণ্ট বোৰ নিৰ্মাণ কৰে৷ প্ৰয়োজনীয় সুবিধাখিনি প্ৰদান কৰি গ্ৰাহকক কিছু কম দামত ফ্লেট কিনিবলৈ সুবিধা কৰি দিয়ে ৷ তথপি এই দ্বিতীয় শ্ৰেণীৰ বিল্ডাৰৰ পৰা ফ্লেট কিনাৰ সামৰ্থ্যও আমাৰ দৰে দৰমহাৰ টকাৰে চলা মানুহৰ নাথাকে ৷ তৃতীয় শ্ৰেণীৰ বিল্ডাৰবোৰে তুলনামূলক ভাৱে কম দামত ফ্লেটৰ যোগান ধৰে ৷ কিন্তু তেওঁলোকৰ বিশ্বাসযোগ্যতা একেবাৰে ক’ম ৷ দাম ক’মাবলৈ চৰকাৰী নীতি-নিয়ম উলংঘা কৰে ৷  একৈশ শতিকাৰ আৰম্ভণিৰ কথা,  বিয়াৰ পিছতে থাকিবলৈ ঘৰ বিচাৰি ফ্লেট চাবলৈ লৈ সেই তৃতীয় শ্ৰেণীৰ বিল্ডাৰ এজনেই মোৰ ভাগ্যত পৰিল ৷ ৪০ টা ইউনিট থকা এপাৰ্টমেণ্টৰ ফ্লেট এটাৰ বুকিং কৰি ঋণলৈ সময়ত টকা জমা দিয়াৰ পিছতো বছৰ বছৰ পাৰ হ’ল ৷ বিল্ডিঙৰ কাম শেষ নহ’ল ৷ ইতিমধ্যে খবৰ পালোঁ বিল্ডাৰে ৪০ টা ফ্লেটৰ বিপৰীতে ৫৫ জন গ্ৰাকৰ পৰা অগ্ৰীম ধন লৈ বহি আছে ৷ উপাইবিহীন হৈ মোৰ নিচিনা অন্য গ্ৰাহকসকলে লগ হৈ এপাৰ্টমেণ্টৰ কাম নিজে কৰিবলৈ আৰম্ভ কৰোঁ আৰু যিমান পাৰি সোনকালে ফ্লেটত সোমাই পৰোঁ ৷ কিছু ধন বেছিকৈ গ’ল, কিন্তু অৱশেষত ফ্লেটটো পালোঁ ৷ বাকী বহুজনে বিল্ডাৰক আধাতকৈ বেছি ধন জমা দিয়াৰ পিছতো ফ্লেটৰ মুখ দেখা নাপালে ৷ পিছলৈ বিল্ডাৰ জেলৰ ভাত খাবলগীয়া হ’ল যদিও যিসকলে টকা দি ফ্লেট নাপালে তেওঁলোকে এতিয়ালৈ টকা ঘূৰাই নাপালে ৷   

     ফ্লেট লোৱা প্ৰায় ১০ বছৰ হ’ল, বেঙ্কৰ ঋণ পৰিষোধ কৰা হ’ল ৷ তিনিটা শোৱা কোঠাৰ ফ্লেট এটা কিনাৰ কথা মনলৈ আহিল, বৰ্তমানৰ ফ্লেট দুটা কোঠাৰহে, কিছু অসুবিধা পাবলৈ আৰম্ভ কৰিছোঁ ৷ দূৰ্ভাগ্যবশত এইবাৰো তৃতীয় শ্ৰেণীৰ বিল্ডাৰহে ভাগ্যত পালোঁ ৷ আছিয়ানা বিল্ডকন নামৰ ব্যৱসায়িক প্ৰতিষ্ঠানৰ প্ৰম’টাৰ স্বামিম আহমেদৰ কথা বতৰা ইমানেই মিঠা যে তেওঁ পতা জালত নিজেই সোমাই পৰোঁ  ৷ ২০১৬ চনত অগ্ৰীম ধন জমা দিলোঁ ৷ কিন্তু বিল্ডিঙৰ কাম আগ নাবাঢ়ে ৷ দুবছৰ বিল্ডাৰক বিচাৰি দৌৰা-দৌৰি কৰাৰ পিছত এদিন জনালে যে মাটিৰ মালিকৰ লগত হেনো কেছ আৰম্ভ হ’ল সেয়ে মোক বেলেগ এঠাইত এটা ফ্লেট দিব ৷ নতুনকৈ এগ্ৰিমেণ্ট হ’ল ৷ পুনৰ অগ্ৰীম ধন দিলোঁ ৷ বিল্ডাৰে দুদিন  কাম কৰিয়ে টকা বিচাৰে , টকা পালে কাম বন্ধ কৰে ৷ টকা দি দি বেঙ্ক একাউণ্ট খালি ৷ এপাৰ্টমেণ্টৰ সকলো কাগজ দিবলৈ ক’লো যাতে বেঙ্কৰ পৰা ঋণ ল’ব পাৰোঁ ৷ বিল্ডাৰে বেলেগ এটা বেঙ্কৰ পৰা ঋণ ল’বলৈ কয়, তেওঁৰ লগত হেনো সেই বেঙ্কৰ লগত সু-সম্পৰ্ক, ঋণ পোৱাত মোৰ অকনো অসুবিধা নহয় ৷ পিছে মই তেখেতৰ কথা নামানিলোঁ, যি বেঙ্কত দৰমহা হয় সেই বেঙ্কৰ পৰাহে ঋণ ল’ম বুলি জোৰ দিলোঁ ৷ শেষত বিল্ডাৰে অন্য উপাই নেদেখি মোক কিছু নথি-পত্ৰ দিলে ৷ ফ্লেটৰ অনুমতি পত্ৰ দেখিহে মোৰ চকু কপালত উঠিল ৷ গুৱাহাটী পৌৰনিগম আৰু গুৱাহাটী মহানগৰ উন্নয়ন প্ৰাধিকৰণে মাটিৰ মালিকক ঘৰ বান্ধিবলৈ অনুমতি দিছে ১৭০ বৰ্গ মিটাৰ এলেকা ৷ বিল্ডাৰে নিৰ্মাণ কৰিলে ২৪২ বৰ্গ মিটাৰ অৰ্থাৎ ৪২% নীতি বহিৰ্ভূত ভাবে বেছিকৈ নিৰ্মাণ কৰে ৷ ফলত বেঙ্কে ঋণ দিবলৈ অমান্তি হয় ৷ বিল্ডাৰক টকা ঘূৰাই দিবলৈ ক’লো ৷ নিদিও বুলি জনাই দিলে ৷ উপাই বিহীন হৈ থানাত কেছ এটা পঞ্জীয়ন কৰোঁ ৷ এবছৰ দৌৰা-দৌৰিৰ পাছত বিল্ডাৰৰ পৰা টকা ঘূৰাই পাওঁ ৷

টকা ঘূৰাই পাওঁতে পাঁচ বছৰ লাগিল যদিও মনত শান্তি পাওঁ ৷ কিন্তু মনত বহুতো প্ৰশ্ন উদয় হ’ল ৷ মোৰ নিচিনা শ শ গ্ৰাহকক কিছুমান বিল্ডাৰে বছৰ বছৰ ধৰি প্ৰবঞ্চনা কৰি  আহিছে ৷ লাখ লাখ টকা বিল্ডাৰৰ হাতত পৰিশোধ কৰাৰ পিছতো থাকিবলৈ ফ্লেট নাপায় ৷ আছিয়ানা বিল্ডাৰৰ মালিক স্বামিম আহমেদে নিৰ্মাণ কৰি থকা কেইবাটাও ঘৰৰ অনুমতি পত্ৰ পৰীক্ষা কৰি দেখিবলৈ পালোঁ যে প্ৰতিটো এপাৰ্টমেণ্টতে নীতি বহিৰ্ভূত ভাবে ৪০%-৫০%  বৰ্গ মিটাৰ এলেকা বঢ়াই ঘৰ নিৰ্মাণ কৰিছে ৷ প্ৰশ্ন হয় গুৱাহাটী পৌৰ নিগম আৰু গুৱাহাটী মহানগৰ উন্নয়ন প্ৰাধিকৰণে  ঘৰ নিৰ্মাণৰ অনুমতি দিয়াৰ পিছত নিৰীক্ষণ কৰিব নাযায় নেকি ৷ নীতি বহিৰ্ভূত ভাবে নিৰ্মাণ কৰা ঘৰবোৰত যদিহে হাতোৰা নলগায় ভৱিষ্যতেও কিছুমান বিল্ডাৰে  মোৰ দৰে শ শ গ্ৰাহকৰ পৰা ধন হৰলুকি কৰিব ৷ চৰকাৰে স্থাপন কৰা অসম ৰিয়েল ইষ্টেট ডেভেলপমেণ্ট অথৰিটীত (ৰেৰা) প্ৰতিজন বিল্ডাৰ আৰু প্ৰতিটো এপাৰ্টমেণ্টৰ পঞ্জীয়ন বাধ্যতামূলক কৰিলে গ্ৰাহকৰ স্বাৰ্থ সুৰক্ষিত হ’ব বুলি ধাৰণা হয় ৷ তদুপৰি স্বামিম আহমদৰ নিচিনা বিল্ডাৰক দৃষ্টান্তমূলক শাস্তি বিহিলেহে ভৱিষ্যতে গ্ৰাহকক প্ৰবঞ্চনা কৰিবলৈ কোনেও সাহস নকৰিব ৷   

(নিয়মীয়া বাৰ্তা কাকতত ৯ মে’ত প্ৰকাশিত)